:برن پور میں بہار اسٹیٹ مائنارٹی کمیشن کے رکن توفیل احمد قادری کی آمد، نئے بنگال کی تعمیر میں تعاون کی اپیل

رحمت نگر میں بی جے پی اقلیتی مورچہ کی جانب سے استقبالیہ، ڈاکٹر شیاما پرساد مکھرجی کے نظریات پر چلنے کا پیغام

پبلک نیوز:—–بہار اسٹیٹ مائنارٹی کمیشن کے رکن توفیل احمد قادری منگل کے روز برن پور کے رحمت نگر علاقے پہنچے، جہاں بی جے پی اقلیتی مورچہ، آسنسول ضلع کی صدر نازنین سبیحہ اور مقامی اسکول کے اساتذہ نے ان کا استقبال کیا۔
اس موقع پر خطاب کرتے ہوئے توفیل احمد قادری نے کہا کہ مغربی بنگال میں بھارتیہ جنتا پارٹی کی حکومت کے قیام میں سبھی طبقات کے لوگوں کی مشترکہ کوششوں کا اہم کردار رہا ہے۔ انہوں نے کہا کہ اس حکومت کی تشکیل میں معاشرے کے ہر طبقے نے اپنا تعاون دیا ہے۔
انہوں نے مزید کہا کہ مغربی بنگال ہمیشہ سے فرقہ وارانہ ہم آہنگی کی سرزمین رہا ہے۔ اسی سرزمین پر جن سنگھ کے بانی ڈاکٹر شیاما پرساد مکھرجی کی پیدائش ہوئی تھی، جنہوں نے سب کو ساتھ لے کر ایک نئے بھارت کی تعمیر کا راستہ دکھایا۔
توفیل احمد قادری نے لوگوں سے اپیل کی کہ وہ ڈاکٹر شیاما پرساد مکھرجی سمیت بی جے پی کے سینئر رہنماؤں کے نظریات پر عمل کرتے ہوئے موجودہ حکومت کے ساتھ مل کر ایک نئے بنگال کی تعمیر میں اپنا کردار ادا کریں۔
اس پروگرام میں بی جے پی اقلیتی مورچہ کے کارکنان، حامیوں اور علاقے کے متعدد معزز افراد بھی موجود تھے۔